KOMBE LA DUNIA-NUSU FAINALI: TATHMINI ARGENTINA v NETHERLANDS

Hii ni Nusu Fainali ya Pili ya Kombe la Dunia, kufuatia ile ya Wenyeji Brazil na Germany inayochezwa Jumanne Usiku.

PATA TATHMINI/DONDOO/VIKOSI VYA MTANANGE HUU:

Nchi hizi zina Historia ndefu kwenye Fainali za Kombe la Dunia ambayo inaanzia Mwaka 1974 kwa Netherlands kuitwanga Argentina 4-0 huko Gelsenkirche, Ujerumani lakini Miaka Minne baadae Argentina, wakiwa kwao Buenos Aires Uwanja wa River Plate, waliitwanga Netherlands Bao 3-1 katika muda wa Nyongeza , baada Sare ya 1-1 katika Dakika 90, na kutwaa Ubingwa wa Dunia.

Safari hii, huko Brazil, Argentina na Netherlands zote zimeonyesha Soka la kuridhisha na wote kubakisha Mechi 2 tu ili kutwaa Ubingwa wa Dunia huku Argentina wakisaka Taji la 3 na Netherlands lao la kwanza.

Argentina

Kama walivyokuwa Wenyeji Brazil na Staa wao Neymar, ni siri ya wazi matumaini na matarajio ya Argentina yapo kwa Lionel Messi.

Lakini, kwenye Raundi za Mtoano, Wachezaji wengine waliibuka na kuchukua jukumu la Messi pale Angel Di Maria alipofunga Bao la ushindi walipoibwaga Switzerland kwenye Raundi ya Pili na Gonzalo Higuain alipofunga Bao la ushindi na kuitosa Belgium kwenye Robo Fainali.

Lakini pia Argentina wanao Wachezaji wengine wapinaji ngangari ambao ni pamoja na Pablo Zabaleta, Javier Mascherano na Ezequiel Garay.

Hata hivyo, Wachambuzi wengi wanaunga mkono kauli ya Kocha wa Belgium, Marc Wilmots, ambae baada ya kufungwa na Argentina, alinena: “Hatukuvutiwa na Argentina. Kama Timu yangu ingecheza kama wao, basi Wanahabari wa Nyumbani wangenikaanga! Argentina ni Timu ya kawaida ila Mchezaji mmoja si kawaida!”

++++++++++++++++++++++

DONDOO MUHIMU:

-Hii ni Nusu Fainali ya kwanza kwa Argentina tangu Mwaka 1990 ambapo walishinda na kutinga Fainali na kufungwa na West Germany.

-Kwenye Kombe la Dunia, Argentina na Netherlands zimekutana mara 4 na Netherlands kushinda mara 2, Argentina mara 1 na Sare 1.

Netherlands

Chini ya Kocha Louis van Gaal, Meneja mpya wa Manchester United, Netherlands imekuwa tishio huko Brazil na Kocha huyo kuonyesha umahiri mkubwa wa kubadilisha mbinu za papo kwa hapo katikati ya Mechi zilizokuwa mrama kwao na kuleta ushindi.

Kwenye Mechi ya Raundi ya Pili, huku wakiwa Bao 1-0 nyuma, Van Gaal alimtoa Nahodha wake na Mfungaji mkuu, Robin van Persie, na kumwingiza Jans-Klaas Huntelaar ambae alitengeneza Bao la kusawazisha la Wesley Sneijder la Dakika ya 88 na yeye mwenyewe kufunga Bao la Pili kwa Penati ya Dakika ya 94 na kuichakaza Mexico 2-1.

Kwenye Robo Fainali, wakiwa Sare na Costa Rica mwishoni mwa Dakika 120 za mchezo, Van Gaal aliamua kumtoa Kipa wake Nambari Wani Cillessen na kumwingiza Kipa wa Akiba Tim Krul kwa ajili ya Mikwaju ya Penati na kweli Krul alidaka Penati mbili na kuifikisha Netherlands Nusu Fainali.

Netherlands walianza kwa kishindo huko Brazil kwa kuwatandika waliokuwa Mabingwa wa Dunia, Spain, Bao 5-1 kwenye Mechi ya Kundi lao.

Wakiwa na Mafowadi Arjen Robben na Robin van Persie, wanaolishwa na Wesley Sneijder, ambae pia ni Mfungaji mzuri, Netherlands wanatarajiwa kuisumbua sana ngome dhaifu ya Argentina.

Uso kwa Uso

-Mechi 8: Argentina wameshinda Mechi 1, Netherlands 4, Sare 3

Mechi za hivi karibuni:

-21 Juni 2006: Netherlands 0-0 Argentina- Kombe la Dunia 2006 FIFA Kundi C, Commerzbank Arena, Frankfurt

-12 Feb 2003: Netherlands 1-0 Argentina- Kirafiki, Arena Amsterdam

-31 Machi 1999: Netherlands 1-1 Argentina- Kirafiki, Arena Amsterdam

-4 Julai 1998: Argentina 1-2 Netherlands- Kirafiki, Olympic Amsterdam

VIKOSI VINATARAJIWA:

Argentina: Romero; Zabaleta, F Fernández, Garay, Basanta; Gago, Mascherano, Perez; Messi; Lavezzi, Higuaín

Netherlands: Cillessen; Blind, Indi , de Vrij, Vlaar, Janamat, Wijnaldum, Sneijder, Guzman, Robben, Van Persie

REFA: Cüneyt Çakir [Turkey]

KOMBE LA DUNIA

JUMATANO, JULAI 9, 2014
SAA	MECHI	KUNDI	UWANJA
2300	Argentina v Netherlands [62]	NUSU FAINALI	Arena Corinthians, Sao Paulo
MSHINDI WA TATU